माणसाचे आरोग्य हे त्याचे निरोगी शरीर आणि स्वस्थ, संतुलित
मानसिक अवस्था यावर पूर्णतः अवलंबून असते. शरीर स्वस्थ ठेवण्याकडे माणसं
लक्ष देतात परंतू, मनाची स्वस्थता, संतुलन आणि शांतता याकडे जाणिवपूर्क
लक्ष दिले जात नाही. आपल्या अवतीभवती घडणाऱ्या अनेक घटनांचे परिणाम हे
मनावर होतात. त्यानुसार आनंद, दुःख, निराशा, हास्य, अपमान, संताप असा भावना
मनांत आणि नंतर अवयवांच्या हालचालींवरून स्पष्ट होतात. आनंद असेल तर तो
हसून, नाचून व्यक्त होतो. दुःख असेल तर डोळ्यांच अश्रू येतात. संताप असेल
तर शरीर थरथरते अथवा अबोल होते. अवमान मनांतल्या मनांत गिळून ठेवला जातो.
अशा भाव-भावनांमुळे मानसिक ताण-तणाव निर्माण होतो. हा ताण-तणाव शरीराच्या
इतर अवयवांवरही प्रभाव टाकतो. त्यांच्या कार्यक्षमतेवर परिणाम करतो.
त्यालाच आपण मानसिक अस्वस्थता म्हणतो.
