रक्तदान हे श्रेष्ठदान आहे असे आपण नेहमी म्हणत असतो.
मात्र, रक्तदानासाठी स्वयंप्रेरणेने राजी होणाऱ्यांची
संख्या आजही मोजकीच आहे. रक्तदानाविषयी प्रचार प्रसार वाढला. पण रक्ताची गरज
असलेल्या जागाही वाढताहेत. रक्ताची गरज ही गंभीर आजाराच्या शस्त्रक्रियांसाठी
असतेच मात्र, अपघात - घातपातातील जखमी, रक्तविषयक दोष असलेले रुग्ण (हिमोफिलिया व थॅलेसीमिया) अशा अनेकांना मानवी
रक्ताची गरज सतत भासत असते. मानवी रक्त हे कोणत्याही रासायनिक प्रक्रियेतून तयार
करता येत नाही. परंतु, मानवाचे विविध गटातील रक्त एकमेकांना वापरता येते. हे
वास्तव लक्षात घेवूनच मानवाचे रक्त मानवासाठी वापरायचे असेल तर ऐच्छिक रक्तदान हाच
पर्याय महत्त्वाचा व उपयुक्त ठरतो.
